Deputeti i Lidhjes Demokratike të Kosovës, Arben Gashi, ka kërkuar nga Lëvizja Vetëvendosje por edhe partitë të tjera parlamentare që të bëhen më të përgjegjshme dhe të gjejnë një zgjidhje për zhbllokimin e situatës në Kuvend.

Ai duke hyrë në objektin e Kuvendit për vazhdimin e seancës konstituive të dielën, tha se ngërçi aktual në Kuvend në zgjedhjen e trupave të legjislativit është për keqardhje.

Gashi tha se për situatën e krijuar në Kuvend ka një mendim ndryshe nga LDK-ja, mirëpo tha se nuk mund të flas në emër të partisë.

“Jam pjesë e partisë, por nuk flas në emër të partisë dhe Grup Parlamentar. Jam prej atyre që kam një mendim ndryshe për këtë çështje”, tha ai.

I pyetur për rolin e presidentes Vjosa Osmani në zhbllokimin e situatës, ai tha se në rastin aktual ajo s’ka asnjë kompetencë dhe se është çështje e partive politike që të gjejnë një zgjidhje.

Kuvendi ka dështuar të konstituojë legjislaturën e nëntë pas zgjedhjeve të 9 shkurtit në shtatë tentime në dy javët e fundit.

E nominuara e LVV-së për kryeparlamentare, Albulena Haxhiu, në katër tentime ka marrë vetëm 57 vota nga 61 të nevojshme për të marrë këtë post.